मिति २०७६।०७।२१ गते

प्रेस विज्ञप्ति

पाँचथर जिल्ला फाल्गुनन्द गाउँपालिकामा मातृभाषा पठनपाठनमा देखिएको अवरुद्धता प्रति किरात याक्थुङ चुम्लुङको गम्भीर ध्यानाकार्षण भएको छ ।

संविधानले ‘मातृभाषा र शिक्षा’लाई विशेष महत्व र प्राथमिकता दिनुका साथै आम् विद्वत् वर्गले यसको पक्षमा मत दिएको सर्वविदितै छ । यसलाई कार्यान्वयन गर्न गराउन संघ, प्रदेश र स्थानीय सरकारहरुलाई औपचारिक माग गरिएको र फाल्गुनन्द गाउँपालिकाले यस सम्बन्धमा शुरुवाती कार्यान्वयन कार्य अभ्यास गरेको थियो, जो अत्यन्त प्रशंसनीय र उदाहरणलायक थियो । तर यस सह्रानीय अभ्यासलाई अबरुद्ध हुने स्थिति जो पैदा भयो त्यस प्रति गहिरो दुख एवम खेद व्यक्त गर्दछौं । यो प्रकरणमा भाषिक, सामाजिक, साँस्कृतिक, राजनीतिक विकासमा अदुरदर्शिता देखा परेको छ ।

मातृभाषा संरक्षण, सम्बद्र्धन र पठनपाठन गर्नगराउन सम्पूर्ण राजनीतिक दलहरु र विभिन्न समुदायहरुको कर्तव्य रहेको स्मरण गर्दै सम्बन्धित सबैमा सहकार्यको लागि हार्दिक अपील गर्दछौं । मातृभाषामा पठनपाठनमा अवरुद्ध हुने अवस्था सृजना भएको हुनाले मातृभाषामा शिक्षा प्राप्त गर्ने अवस्थाको सुनिश्चितताका लागि उचित व्यवस्था यथाशीघ्र गर्न संघ, प्रदेश र स्थानीय सरकार लगायत सम्बन्धित सरोकार पक्ष सबैमा जोडदार माग गर्दछौं ।

योगराज लिम्बू वनेम

अध्यक्ष, केन्द्रीय कार्य समिति