2021-05-21

झापा विर्तामोडमा संगठन तथा जनगणना प्रशिक्षण सम्पन्न

मिति २०७७ चैत ८ गते । झापा जिल्ला विर्तामोड, चारपानेस्थित झापा चुम्लुङ हिममा किरात याक्थुङ चुम्लुङको राष्ट्रिय अभियान अनुरुप ‘संगठन तथा जनगणना प्रशिक्षण कार्यक्रम’ सम्पन्न भएको छ । किरात याक्थुङ चुम्लुङ विर्तामोड समितिको व्यवस्थापन र झापा जिल्ला कार्य समितिद्वारा आयोजित कार्यक्रमको अध्यक्षता सेसेहाङ फियाक, प्रमुख प्रशिक्षण मन्तव्य प्रस्तुति केन्द्रीय अध्यक्ष योगराज लिम्बु वनेम सहित सचिवालय सदस्य गोविन्द आङबुङले गर्नुभएको थियो । प्रशिक्षण कार्यक्रमको उद्घोषण जिल्ला सचिव प्रेमचन्द्र लिम्बु, शुरुवातमा विर्तामोड नगर अध्यक्ष हिमालय कन्दङवाबाट सहभागीहरुलाई स्वागत मन्तव्य, कार्यक्रमको बारेमा प्रकाश पार्ने कार्य जिल्ला उपाध्यक्ष काली बहादुर खेबाङ र प्रमुख अतिथिबाट ब्यानर बाचन गरेर उद्घाटन भएको थियो ।

उक्त प्रशिक्षण कार्यक्रममा प्रमुख प्रशिक्षक अध्यक्ष वनेमले मन्तव्य राख्ने क्रममा चुम्लुङको ३२ वर्षको अवधिमा लिम्बु समाजप्रति क्रियाशील, भौतिक भवनहरु सहित संगठानात्मक रुपले फैलावट रहेको चर्चा गर्दै वर्तमानमा चुम्लुङले पहिचान, अधिकार, राज्यमा आदिवासी जनजातिको पक्षमा वैचारिक एवम् कार्यक्रमुलक गतिविधिहरुमा क्रियाशील रहेको बताउनुभयो । चुम्लुङको स्थापनाकालको परिदृष्य चर्चा गर्दै पछिल्लो समयमा चुम्लुङ पंक्ति सांस्कृतिक बढी वैचारिक कमजोर हुँदै गइरहेको प्रति चिन्ता व्यक्त गर्दै राज्यमा उपस्थिति बृद्धिको लागि राज्यसंरचनामा र राजनीतिक सत्तामा उपस्थिति बढाउनको लागि क्रमशः युवा विद्यार्थी पंक्तिलाई प्रशासनयन्त्रमा प्रवेशको लागि लोक सेवा तयारी कक्षाहरु र आदिवासी जनजातिमा देखापरेको साँस्कृतिक चेतलाई राजनीतिक चेतमा परिणत गर्न गराउन सकृय रहनुपर्ने बताउनुभयो । नेपालको वर्तमान राजनीतिक परिस्थितिमा जननिर्वाचित नेताको स्वेच्छाचारिताबाट संघीय लोकतान्त्रिक गणतन्त्र, धर्मनिरपेक्षता, समानुपातिक समावेशितामा देखापरेको प्रतिगमन एवम् संकटप्रति सचेत भई बृहत नागरिक आन्दोलनसँगै चुम्लुङ पंक्ति संघर्षरत रहनुपर्ने बताउनुभयो । लिम्बु समाजमा योगदान गर्ने हिसाबले संघसंस्थाहरु खोलिनु स्वभाविक भएता पनि किरात याक्थुङ चुम्लुङ विरुद्ध लाग्नुले समग्र समाज विकासमा योगदान गरिरहेको छैन भनी सबैलाई सचेत गराउनुभयो । आदिवासीहरुको भूमि अधिकार विशेषत आफनो धार्मिक सांस्कृतिक थातथलोहरुको संरक्षण, सामुदायिक एवम् सामुहिक भूमिहरुको संरक्षण तत् कार्यको लागि याक्थुङ सयङ(थरगत)हरुको सहजीकरण एवम् संगठीत कार्यमा चुम्लुङ पछिल्लो समयमा क्रियाशील रहेको बताउनुभयो । नयाँ परिवेशमा संघ, प्रदेश र स्थानीय तहमा देशको राज्य संरचना बनिरहेको र साधनश्रोत वितरण भइरहेको सन्दर्भमा चुम्लुङलाई पनि सोही अनुरुप संगठीत र क्रियाशील गराइरहेको बताउँदै चुम्लुङका नगरपालिका तथा गाउपालिका स्तरीय समितिहरुलाई आआफनो सम्बन्धित पालिकाहरुमा सामाजिक, साँस्कृतिक, आर्थिक र राजनीतिक हिसाबले साधनश्रोत, विषयगत कार्यक्रमहरु र हकअधिकार कार्यान्वयन गराउनको लागि सकृय हुन अपील गर्नुभयो ।

राष्ट्रिय जनगणनाको सन्दर्भमा हाल समाजमा भएको विविध विवादहरुको सन्दर्भमा चुम्लुङले जिम्मेवार र आम दृष्टिकोण दिएर गइरहेको अवस्था छ, समय र परिणामले सबैलाई परिक्षण गर्ने बताउनुभयो । कियाचु केन्द्रले आगामी राष्ट्रिय जनगणनाको सन्दर्भमा अपील गरेको विचार तथा दृष्टिकोणहरु प्रस्तुत गर्नुभयो । साथै यो प्रशिक्षणमा जनगणना सम्बन्धीको अपील पर्चाहरु वितरण गर्दै केन्द्रबाट तयार गरिएको रेडियो जिंगल सबै सहभागीहरुलाई सुनाउँदै जातजातिमा लिम्बु, भाषामा लिम्बु र धर्ममा किरात लेख्नुपर्ने तर्क, तथ्य र कियाचु नेपालको दृष्टिकोणहरुको बारेमा प्रस्तुति गर्नभई विभिन्न भ्रमहरुलाई प्रष्ट पार्ने मन्तव्यहरु राख्नुभयो । जनगणनामा अन्य आदिवासीहरु राईले खम्बु, मगरले लाङघाली, गुरुङले तमु, तामाङले मुर्मी लेखौं किन भनेनन्, लिम्बुले चाहि किन याक्थुङ लेख्नुपर्ने तर्कको छरछिमेकीको विवेकसँग तुलना गरी सचेत हुन र समयसान्दर्भिकता बुझन सबैलाई अपील गर्नुभयो । साथै धर्मको सन्दर्भमा नेपालकै परिवेशमा किरात लेखिएको नकि अन्यबाट प्रभावित नभएको साथै अन्य मुलुकको परिवेश फरक होलान् भनी बुझनुपर्ने बताउनुभयो । जनगणनाको सन्दर्भमा सचिवालय सदस्य आङबुङले थप विस्तृत मन्तव्य राख्दै जनगणनामा स्पष्ट भएर सबै पंक्ति लाग्नुपर्ने बताउनुभयो । यी विचारहरु सहित लिम्बु समुदायमा गई प्रष्ट गर्न गराउन साथै बाँकी गाउँस्तरीय प्रशिक्षणहरु चलाउन सम्बन्धित कार्य समिति सकृय रहनुपर्ने अपील गर्नुभयो ।

उक्त प्रशिक्षण कार्यक्रममा सहभागीहरुबाट चुम्लुङको इतिहास, धर्मको नामाकरणमा विवाद, आदिवासी जनजातिहरुको स्थिति, जनगणनामा तथ्याङक कुन अवस्थामा घट्ने, लिम्बुवान आन्दोलनको किन सुस्त, विभूतिहरुको बारेमा, भाषिक अवस्था आदिका बारेमा प्रश्नहरु आएका विभिन्न प्रश्नहरुको जवाफ एवम् छलफल भई एकापसमा स्पष्ट हुने कार्य सम्पन्न भयो । कार्यक्रममा मनु जबेगु, जनबहादुर जबेगु, इन्द्र बहादुर इङनाम बारादशी गाउँ अध्यक्ष, इन्द्रकुमार इजम झापा गाउँ अध्यक्ष, पुर्ण कुमार हाङश्रोङ केन्द्रीय सदस्यले मन्तव्य राख्नुभयो । उक्त कार्यक्रमको अन्तमा जिल्ला अध्यक्ष फियाकले लिम्बु भाषामा नै मन्तव्य राख्दै झापामा १० हजार पर्चा छाप्ने, रेडियो जिंगल, स्थानीय पत्रिकाहरुमा व्यापक प्रचारप्रसारमा जाने योजना बताउनुभयो र सबैलाई धन्यवादसहित कार्यक्रम समापन गर्नुभयो । कार्यक्रममा विर्तामोड नगर समिति अन्तर्गत बनेका अधिकांश वडाका अध्यक्ष, सचिव, युवा, महिलाहरुको राम्रो सहभागिता रहेको देखियो । कियाचु लिम्बुवान प्रदेश समितिको समन्वय रहेको थियो ।