ᤁᤠᤌ᤻ᤔᤠᤴᤍᤢ, ᤏᤓᤧᤶᤒᤷ ᥇ ᤕᤧᤴ॥ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤏᤧᤐᤠᤸ ᤏᤢ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤗᤠᤱᤃᤧᤳ ᤁᤥᤖᤡᤕᤠ ᤋᤱᤏᤧᤛᤡᤀᤠᤱ ᤆᤥᤃᤧᤛᤡᤒᤠ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤀᤢᤏᤡᤁᤥᤍ᤻ ᤁᤡᤒᤥᤷᤍ᤻ᤀᤡᤴ ᤋᤢᤶᤒᤠ ᤋᤖᤣᤒᤠ ᤋᤃᤠᤱᤛᤢᤔᤠ ᤕᤶᤒᤢᤗᤢᤱᤍᤠᤱᤒᤠ ᤒᤤᤖᤠᤃᤡ ᤁᤠᤀᤡᤗᤠᤖᤧ ᤁᤠᤰᤀᤡᤱᤛᤧ ᤆᤥᤃᤢᤀᤠᤱ ᤘᤠ᤹ ॥ ᤋᤃᤠᤱᤛᤢᤔᤠ ᤕᤶᤒᤢᤗᤢᤱᤍᤠᤱᤒᤠ ᤁᤠᤀᤡᤗᤠᤖᤧ ᤒᤩᤠᤏᤷᤒᤠ ᤐᤠ᤺ᤴ ᤏᤡᤖᤢᤀᤠᤱ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ᤀᤡᤴ Yakthung KS (©KYC) ᤁᤠᤰᤀᤡᤱᤛᤧᤛᤡᤱ ᤏᤡᤖᤢᤀᤠᤱ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ᤀᤡᤴ ᤁᤠᤰᤀᤡᤱᤛᤧ ᤆᤥᤃᤢᤒᤠ ᤖᤥ॥

 ᤁᤡᤒᤥᤷᤍ᤻ ᤁᤠᤰᤀᤡᤱᤛᤧ ᤏᤡᤱᤘᤠ᤹ ᤐᤠ᤺ᤴ ᤕᤢᤱᤏᤢ ᤋᤢᤶᤒᤠ ᤋᤖᤣᤒᤠ ᤁᤠᤀᤡᤗᤠᤖᤧ ᤐᤠ᤺ᤳᤋᤢ, "ᤀᤠᤀᤡᤴ ᤕᤠᤰᤌᤢᤱ ᤁᤡᤒᤥᤷᤍ᤻ ᤁᤠᤰᤀᤡᤱᤛᤧ ᤐᤥ᤺ᤰᤂᤧᤒᤠᤀᤥ ᤀᤠᤱᤃᤠ᤹ ᤛᤠᤖᤡᤰ ᤀᤠᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹॥ ᤘᤡᤁᤪᤶ ᤋᤱᤒᤣ ᥈᥆᥊᥍ ᤀᤥ ᤏᤧᤐᤠᤸ ᤛᤡᤰᤁᤢᤶᤍᤡᤱ ᤕᤶᤒᤢᤗᤢᤱᤀᤥ ᤛᤡᤰᤁᤢᤶᤍᤡᤱᤒᤠ ᤐᤥ᤺ᤰᤂᤠᤱᤅᤠᤱ ᤐᤠ᤺ᤴᤇᤣ᤺ᤰᤘᤠᤓᤢ ᤛᤠᤵᤗᤰ ᤆᤥ᤺ᤰᤛᤧ ᤆᤥ᤺ᤰᤔᤠᤏᤠᤒᤠ ᤑᤴᤋᤖᤧ ᤕᤠᤰᤌᤢᤱ ᤛᤠᤵᤔᤠᤀᤥ ᤀᤡ᤺ᤳᤔᤧᤴᤒᤧᤳ ᤗᤧᤰᤛᤡᤱ ᤋᤠᤖᤢᤀᤠᤱ ᤘᤕᤧ॥ ᤂᤧᤴ ᤜᤧᤰᤁᤣ ᤀᤣ ᤁᤢᤛᤱ ᤆᤥ᤺ᤰᤛᤡᤱᤒᤠ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ᤖᤧ ᤕᤠᤰᤌᤢᤱ ᤛᤰᤛᤰ ᤀᤴᤗᤠᤀᤡᤴ ᤀᤥᤃᤠᤵᤔᤠ ᤕᤠ᤺ᤶᤒᤰᤀᤥ ᤐᤕᤶᤕᤶᤒᤠ ᤗᤧᤰᤛᤡᤱ ᤋᤠᤖᤢ᤹ ᤁᤧᤗ᤹ᤒᤠ ᤀᤏᤛᤠᤴ ᤘᤠ᤹॥"

 ᤕᤶᤒᤢᤗᤢᤱᤍᤠᤱᤒᤠ ᤁᤠᤀᤡᤗᤠᤖᤧ ᤋᤃᤠᤱ ᤐᤠ᤺ᤴ ᤑᤥᤛᤢ, "ᤑᤴᤳᤀᤡᤴ ᤕᤢᤏᤡᤁᤥᤍ᤻ᤀᤥ ᤏᤠᤖᤠ ᤗᤧᤱᤛᤡᤱ॥ ᤕᤢᤏᤡᤁᤥᤍ᤻ ᤛᤠᤵᤗᤰᤔᤠ ᤀᤢᤛᤢᤖᤢ ᤁᤧᤒᤥ᤺ᤱᤒᤠ ᤁᤡᤒᤥᤷᤍ᤻ ᤆᤥ᤺ᤰᤛᤡᤱ॥ ᤀᤠᤸᤗ ᤕᤠᤰᤌᤢ ᤐᤠ᤺ᤴ ᤛᤠᤵᤔᤧᤴ ᤁᤧᤖᤧᤰᤀᤥ ᤁᤧᤳ॥ ᤋᤃᤠᤱ ᤑᤴᤳ ᤆᤥ᤺ᤰᤔᤠᤀᤥ ᤀᤠᤱ ᤆᤢᤶᤗᤢᤱᤖᤧ ᤑᤠ᤹ᤛᤡᤱ ᤁᤧᤳᤋᤢᤀᤠᤱ ᤘᤕᤧ॥ ᤀᤠᤸᤗᤥᤀᤠᤱ ᤆᤢᤶᤗᤢᤱᤖᤧ ᤀᤣ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ ᤆᤥ᤺ᤰᤔᤠ ᤛᤠᤵᤔᤢᤴᤎᤢᤶᤔᤡᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹॥ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤏᤧᤐᤠᤸ ᤏᤢ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤗᤠᤱᤃᤧᤳ ᤁᤥᤖᤡᤕᤠᤀᤥ ᤕᤖᤡᤰ ᤕᤖᤡᤰ ᤏᤢᤃᤧᤴ ᤘᤠ᤹॥"

ᤁᤴ ᤏᤢ ᤋᤃᤡ ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱ ᤗᤠᤱᤃᤧᤳ ᤁᤥᤖᤡᤕᤠᤠᤒᤠ ᤗᤢᤶᤔᤡᤒᤠ ᤌᤥᤛᤢᤎᤡᤶᤒᤠ ᤍᤡᤷᤈ ᤁᤠᤱᤓᤠ ᤒᤰᤂᤡᤶᤖᤧ ᤁᤡᤖᤠᤋ᤻ ᤛᤡᤖᤡᤈᤱᤃᤠ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ ᤆᤥ᤺ᤰᤛᤧ ᤆᤠᤜᤠᤁᤧᤈᤥ᤺ᤰᤐᤠ ᤕᤠᤱᤛᤢᤶ ᤀᤠᤰᤁᤣᤖᤡᤰ ᤛᤢᤶᤛᤡᤱ ᤁᤧᤗ᤹ᤒᤠ ᤋᤶᤛᤡᤱ ᤐᤠ᤺ᤴ ᤕᤢᤰᤂᤢᤖ ᤛᤠᤵᤔᤢᤴᤎᤢᤶᤔᤡᤒᤠ ᤕᤠ᤺ᤶᤒᤰ ᤐᤥ᤺ᤰᤂᤧᤒᤠᤀᤥ ᤜᤠᤱᤜᤠᤱ ᤗ᤹ᤖᤧᤒᤠ ᤁᤢᤏᤡᤱᤘᤠ᤹ ᤐᤠ᤺ᤴ ᤋᤥ᤺ᤴᤍᤢ॥

ᤕᤢᤏᤡᤁᤥᤍ᤻ᤖᤧᤴ ᤕᤠᤰᤌᤢᤱ ᤁᤡᤒᤥᤷᤍ᤻ ᤁᤧᤈᤥ᤺ᤰᤐᤠ ᤐᤠᤘᤴ ᤆᤡᤋᤪᤁᤠᤷᤖᤧ ᤁᤢᤛᤱ ᤁᤡᤒᤥᤷᤍ᤻ᤀᤡᤴ ᤆᤢᤶᤗᤢᤱᤒᤠ ᤘᤧᤒ᤻ᤛᤠᤀᤡᤳ ᤗᤠᤶᤒᤠ ᤍᤠᤀᤢᤴᤗᤥᤍ᤻ ᤆᤥ᤺ᤰᤔᤠᤀᤠᤱ ᤀᤡᤴᤛ᤻ᤋᤸ ᤆᤥ᤺ᤰᤔᤠ ᤀᤣᤃᤠᤱ ᤁᤶᤐᤩᤢᤋᤷ ᤖᤡᤀᤡᤴᤛ᤻ᤋᤸ ᤆᤥ᤺ᤰᤔᤠᤀᤠᤱ ᤀᤥᤃᤠᤵᤔᤠ ᤛᤢᤰᤋᤧᤵᤐᤠ ᤐᤣᤗᤠᤶ ᤋᤥ᤺ᤴᤍᤢ॥

ᤁᤡᤖᤠᤋ᤻ ᤕᤠᤰᤌᤢᤱ ᤆᤢᤶᤗᤢᤱᤒᤠ ᤆᤢᤶᤓᤥᤍᤡᤱ ᤌᤥᤛᤢᤎᤡᤶᤒᤠ ᤐᤪᤧᤶ ᤕᤧᤰᤋᤧᤴᤖᤧ ᤀᤠᤀᤡᤴ ᤁᤠᤰᤀᤡᤱᤛᤧ ᤐᤥ᤺ᤰᤂᤧᤒᤠ ᤕᤢᤏᤡᤁᤥᤍ᤻ ᤁᤡᤒᤥᤷᤍ᤻ ᤆᤥ᤺ᤰᤔᤠ ᤀᤠᤰᤁᤣ ᤗ᤹ᤖᤡᤰ ᤐᤥᤅᤡᤗᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤋᤶᤛᤡᤱᤜᤠ᤹ ᤌᤧᤵᤐᤧᤳᤋᤠᤱ ᤋᤠ᤹ᤎᤰᤋᤢᤀᤠᤱ ᤘᤕᤧ॥ ᤌᤥᤛᤢᤎᤡᤶᤒᤠ ᤕᤧᤰᤋᤧᤴᤖᤧ ᤀᤠᤸᤗ ᤕᤠᤰᤌᤢᤱ ᤐᤠ᤺ᤴ ᤛᤠᤵᤛᤰ ᤛᤠᤵᤔᤠᤀᤡᤴ ᤁᤢᤛᤱ ᤕᤧᤶᤀᤥ ᤗᤠᤛᤧᤒᤠ ᤐᤠ᤺ᤴ ᤆᤧᤰᤂᤢ॥ ᤋᤢᤳᤋᤢ ᤕᤧᤰᤋᤧᤴᤖᤧ ᤀᤠᤸᤗ ᤜᤠᤖᤠ ᤀᤣ ᤔᤥᤒᤠᤀᤡᤸᤀᤥ ᤀᤥᤃᤠᤵ ᤁᤧᤒᤥ᤺ᤱᤒᤠ ᤁᤡᤒᤥᤷᤍ᤻ ᤆᤥ᤺ᤰᤛᤡᤱᤒᤠ ᤐᤠ᤺ᤴᤀᤠᤱ ᤐᤠ᤺ᤳᤋᤢ॥